U capèl ad pàja*
“Mùstar d’õn bagài” lé l’am dśìva,
ma péna me só u bèn c'am vurìva.
A ma ninèva ẽnsa bãnca da fiulèn
Tàca a stüva cõn parparà i fasèn.
Da Custabiancóna a nàva a Culëtta
seimpar a pé o cõn a vérda biciclëtta.
Ẽnti cãmp con sö õn capél grãnd ad pàja,
con tütt u sò lavù as meritàva õna mdàja.
Õna nònna tuttofare, ẽn cüśéna õn amùr.
I sò süg meravigliùś, ẽn sal fög par di ùr.
A dumìnca l’àg spetàva, par lé séram õn rgàl
tütt’ẽnséma as partìva, par la mëssa a Grupàl.
A tò mdàja cara nonna a lé u tò unùr
tütt e vìtt fàtt cõn Gianètu, e u vos sudùr.
S'àg pẽns am végna adòs la nustalgìa,
ma u tò eśẽmpi ad vita u m’ãndrà mai via.
Claudio Gallini
* Il dialetto di questa poesia è quello groppallino, ma con le sfumature tipiche di Coletta.